ويتجدد اللقاء مع المعين الصافي لأدباء ومواهب أبناء أرض الكنانة ،وضيفنا في هذا السطور الأديب الشاعر معوض حلمي الملقب بـ”الفلاح الفصيح”ابن منشأة بطاش ..تمي الأمديد محافظة الدقهلية ،والذي أهدي منصة “المساء أون لاين” غيضا من فيض إبداعاته ورباعياته من شعر العامية المصرية الأصيلة وهي : فاس وطين ، إغـزل الأفـراح بشـاير عمي قناوي ، السيسبان سارحه..
🍂
فاس وطين ..
قد يعجبك أيضاً
شمس عمري من خطوطها
للغـــروب ماشـيه بحنين
رحلـتي قـربت شطـوطها
لـو هاقيسـهم خطـــوتين
لو مـلاك الـروح قبضــها
خلوا سيرتي بينكوا فكره
خلوا شعري يحيي ذكرى
نبض عاشق فاس وطين
عاش يرص الحــرف بنا
من حصى الريف الأمين
🍂
إغـزل الأفـراح بشـاير
الإشارة فعلك إنت ..
لـو لقيـت النـور معدي
إفتـــح الســكه لعينيه
وإن لقيت قدامه مانع
مـد إيـدك خـــد إيديه
أطـرد الضـلمه الغبــيه
رد عـن ناســـــك أذيه
إزرع الضـحكه العفـيه
زرع إيـدك هاتلاقيــــه
لـو لقيـت النـور معدي
إفتـــح الســكه لعينيه
………………………..
لـو لقيت النـور حـزين
والســجر نزلـت دموعه
إنـده البســـمه بحنــين
والأمــل جهــز شـموعه
رحلتـك قايـده الأشاير
خـلي نول الصـبر داير
واغـزل الأفـراح بشـاير
والأمان يضمن رجوعه
لـو لقيت النـور حـزين
والســجر نزلـت دموعه
…………………………
لو لقيـت النور موالس
يبقى خايف م الطـريق
شاف بعينه الغدر دايس
الصديق مابقاش صديق
إفرد شراعك ف البراح
طير بقى وداوي الجراح
وانده الزمـن اللي راح
يعدي م المـوج الغـريق
لـو لقيـت النور موالس
يبـقى خايف م الطـريق
…………………………
لو لقيت النــور نسـاير
والبشـــر زايدين أنــين
لف وياهـــــــــم دوايـر
واوعى تلعن ف السنين
أو تعيـش دور الأونطـه
خطوتك مشنوطه شنطه
ع الصراط الحق ظابطه
والإشـــاره فعــلك انت
وانت عارف فاتحه فين
لو لقيت النــور نسـاير
والبشـــر زايدين أنــين
🍂
عمي قناوي
سألت عمي قناوي عن نوع تقاوي نضيف
يمكن يعيد الغناوي ونعيش بقلب عفيف
قالي زمان النخوه كات فينا سنه وفرض
دلوقتي غاب الفرض والسنه مش ع الكيف
🍂
السيسبان سارحه
إزاي اغض الطرف ، والسيـسبان سـارحه
لابسه الملايه اللف ، وعايقه ف الطـرحه
ناديت عليها يابت ، خــفي الدلال حــبه
دي نظـرتك صـبه ، ف القلب ميت فرحه
قالت ياواد مالك ، خلي الكلام بأصـول
بيتنا هـنا قـــبالك ، أدخـل وبالمعــدول
أنا بنت عيله وناس ، شايله الشرف تاجي
بالود لو تاجــــي ، تلقى الوداد موصول.
🍂
